Purtret

Allegra a Tschlin - Strada - Martina!

Ün cumün aint illa regiun da cunfin
Aint illa regiun da cunfin da la Svizra, l'Austria e l'Italia, sün üna bellischma terrassa sulagliva, sta Tschlin , sco ün gnieu d'aglia, ot sur l'En. Las duos fracziuns Strada e Martina, 400 m plü bass, sun situadas gio'l fuond da la vallada güst sper l'En. Tschlin - Strada - Martina, il cumün aint il cour da las Alps.

Ün cumün cun ideas furbras
Tschlin prodüa sper bunas ideas eir la cuntschainta Biera Engiadinaisa biologica. Oters prodots e servezzans d'ota qualità, suot il nom Bun Tschlin tenschan dal licör da chasa, il joghurt da bescha e chaschöl chavra fin pro la charn da muvel muntagnard da la Scozia (Highland Cattle).

Turissem moderà per ün suggiuorn agreabel
Ün pa davent da las massas da turists e glischtess dastrusch als centers da Skis Scuol, Samignun-Ischgl, Danuder-Tirol e Schöneben/Vnuost, eis la regiun intuorn Tschlin ün paradis per il sportist d'inviern. Eir per ir a spass as chatta davent da Tschlin bleras pussibiltads. Per il bainstar dals giasts pisseran pitschnas e scharmantas pensiuns e restorants creativs, ed i's po scuvrir varsaquantas attracziuns.

Ün cumün cun cultura
Duos coros ed üna società da musica, quai nu s'inclegia da sai per ün cumün usché pitschen, e muossa quant integrada cha la cultura eis in quist cumün. Durant il Xong Festival eis Tschlin dafatta ün pitschen center da musica e chi chi nun ha amo dudì la musica dals Fränzlis da Tschlin, stess müdar quai pü svelt pussibel.