Tschlin – Cultura sur 1500m

Ils puncts centrals da la cultura locala fuorman duos coros masdats ed üna società da musica . Quai es üna situaziun fich comfortabla chi nu s’inclegia da sai pro ün uschè pitschen nomer d’abitants. Ün segn fich positiv dal pensar cultural in tuot la regiun ed eir ün inrichimaint per la vita da minchadi es sgürmaing il fat, cha in pitschens cumüns cun per part paca tschient abitants, existan per regla üna società da musica sün fich bun nivel, almain ün coro sco eir otras fuormaziuns da musica e da chant in plüssas grondezzas ed in differents stils. Quist trend zuond plaschaivel es sgürmaing ün merit da l’ourdvart buna lavur da la scoula da musica d’Engiadina Bassa.

Üsanzas tradiziunalas sun ün elemaint da gronda portada per la cumünanza a Tschlin. Festas sco Mattinadas (bal per uffants) e Chalandamarz (festa per salüdar la prümavaira) sun evenimaints importants da l’on, chi vegnan imbellits cun musicas da bal ad.hoc. cun musicantas e musicants da cumün.

Sco lö d’occurenza dal festival Xong, giova Tschlin üna rolla importanta in la vita culturala da la regiun dals trais pajais e dürant l’eivna dal festival dvainta il cumün ün center musical.